Yanga, Azam usihadithiwe

AZAM FC ina kibarua kigumu cha kufuta uteja kwa Yanga katika mechi za Ngao ya Jamii wakati zitakapomenyana leo katika mechi ya kufungua msimu wa 2015-16 kwenye Uwanja wa Taifa, Dar es Salaam.

Mechi hiyo itakuwa ya tatu mfululizo kwa timu hizo mbili ambazo zimekuwa na ushindani mkubwa katika soka la Tanzania baada ya kudorora kwa Simba katika miaka ya karibuni hasa katika Ligi Kuu ya Tanzania Bara.

Tangu msimu wa 2012-13, Yanga na Azam FC zimekuwa zikipokezana katika nafasi mbili za kwanza za ubingwa wa Bara, Yanga ikitwaa taji msimu uliomalizika baada ya klabu ya Chamazi kutawazwa kwa mara ya kwanza msimu wa 2013-14 ikilipoka taji kutoka kwa vijana hao wa Jangwani.

Lakini katika mechi za Ngao ya Jamii ambazo hukutanisha bingwa na mshindi wa pili, mara mbili mfululizo Yanga imeibuka mshindi ikianza kwa ushindi wa bao 1-0 la Salum Telela kabla ya Agosti mwaka jana kushinda kwa mabao 3-0, yakifungwa na Geilson Santana Santos maarufu Jaja na Simon Msuva.

Hivyo, Azam FC leo itakuwa na kibarua kikali cha kubadili matokeo hayo mbele ya mashabiki kwenye uwanja huo mkuu wa Taifa, ingawa timu hiyo imekuwa ikipata ushindi katika Ligi Kuu dhidi ya Yanga.

Katika msimu uliomalizika, mechi ya kwanza ilimalizika kwa sare ya mabao 2-2 kabla ya Azam FC kushinda mabao 2-1 na kupata nafasi ya pili katika ligi na kuipiku Simba iliyokuwa ikinyemelea nafasi hiyo.

Aidha, katika michuano ya Kombe la Kagame iliyomalizika mapema mwezi huu kwenye Uwanja wa Taifa, Azam iliishinda Yanga kwa penalti katika mechi ya robo fainali baada ya sare ya 0-0 katika dakika 90 na kikosi hicho cha Mwingereza Stewart Hall kwenda hadi nafasi na kutwaa ubingwa ikiizamisha Gor Mahia kwa mabao 2-0.

Kwa hiyo, mechi ya leo inatarajiwa kuwa ya ushindani mkubwa kutokana na matokeo hayo ya nyuma, lakini pia kwa sababu ya uimara wa usajili wa timu hizi mbili ambazo kwa sasa zimelikamata soka la Tanzania, si tu kwa ubora wao uwanjani, bali hata kwa uwezo wao wa kifedha.

Azam FC inajivunia fedha za mmiliki wake, mfanyabiashara maarufu na tajiri nchini, Said Salim Bakhresa wa makampuni ya Bakhresa Group wakati Yanga inaongozwa na Mwenyekiti ambaye pia ni mfanyabiashara maarufu na tajiri nchini, Yusuf Manji ambaye ni Ofisa Mtendaji Mkuu wa Quality Group.

Fedha za matajiri hao wawili zimewezesha timu hizo kusajili wachezaji wanaowataka ndani na nje ya nchi na hilo linathibitishwa na kuwapo kwa wachezaji saba wa kigeni katika Yanga ambao ni Haruna Niyonzima, Mbuyu Twite, Amissi Tambwe, Andrey Coutinho, Donald Ngoma, Thabani Kamusoko na Vincent Bossou.

Kamusoko na Bossou wamesajiliwa mara tu baada ya kumalizika kwa Kombe la Kagame, huku Kamusoko ambaye ni kiungo akitokea FC Platinum ya Zimbabwe na beki wa kati kutoka Togo, Bossou alikuwa akicheza barani Asia.

Kwa Azam, inao nyota wa kigeni kama Michael Balou, Kipre Tchetche, Didier Kavumbagu, Jean Mugiraneza, Pascal Wawa na Alan Wanga ambaye ni Mkenya, hajaanza kucheza kutokana na kufiwa na mama yake.

Aidha, vikosi vyao vinajivunia wachezaji wa ndani wanaotesa kwa sasa kama Geoffrey Mwashiuya, Deus Kaseke, Haji Mwinyi, Malimi Busungu na Mateo Simon ambao ni wapya kwa upande wa Yanga, lakini tayari baadh yao wameanza kuonesha cheche zao.

Simon amesajiliwa kutoka KMKM baada ya Kombe la Kagame. Ame Ali na Ramadhani Singano ni wapya katika kikosi cha Azam lakini makali yao yanafahamika kwa wapenzi wa soka nchini ambao watafurika kwa wingi leo kupata uhondo wakati wakijiandaa na Ligi Kuu ya Bara inayoanza Septemba 12, mwaka huu, wiki moja baada ya Taifa Stars kucheza na Nigeria ‘Super Eagles.’

Kwa mujibu wa Shirikisho la Soka Tanzania (TFF), mechi hiyo itaanza saa 10 kamili jioni na itachezeshwa na mwamuzi kutoka Morogoro, Martin Saanya badala ya Israel Nkongo wa Dar es Salaam ambaye ni mgonjwa.

Ilisema tiketi zitaanza kuuzwa leo asubuhi katika magari maalumu maeneo ya Uwanja wa Taifa ambako kiingilio cha chini kitakuwa Sh 7,000 na kiingilio cha juu ni Sh 30,000 kwa VIP A.

Kabla ya mchezo huo, kutakuwa na mchezo wa utangulizi utakaozikutanisha timu ya wachezaji wa zamani wa timu ya Taifa (Taifa Stars Legends) dhidi ya Ukonga Veterani, ilisema TFF na kuongeza kuwa milango ya uwanja itakuwa wazi kuanzia saa tano kamili asubuhi.

Yanga yatinga robo fainali Kagame

PRESHA imeshuka. Klabu ya Yanga imefanikiwa kutinga hatua ya Robo Fainali ya Klabu Bingwa Afrika Mashariki na Kati, Kombe la Kagame baada ya kuibuka na ushindi wa mabao 2-0 dhidi ya KMKM ya Zanzibar, katika mchezo uliochezwa kwenye Uwanja wa Taifa, Dar es Salaam.

Katika mchezo huo wa Kundi A, mabao yote ya Yanga SC yalipatikana kipindi cha pili, yakifungwa na Malimi Busungu na lile la kujifunga la beki wa KMKM,Khamis Ali.

Busungu alifunga bao lake la tatu katika mashindani hayo dakika ya 55 akimalizia pasi ya Mzimbabwe, Donald Ngoma aliyeitoa huku amebanwa na mabeki wa KMKM waliomuwekea ulinzi mkali leo. Khamis Ali alijifunga bao dakika ya 72 akiwa katika harakati za kuokoa mpira wa krosi uliopigwa na Ngoma huku akizongwa na Amissi Tambwe kwa nyuma.
Kwa matokeo hayo Yanga imefanikiwa kutinga hatua ya Robo Fainali wakiwa wanashika nafasi ya tatu nyuma ya Knartoum N ya Sudan wanaoongoza kwa pointi zao saba sawa na Gor Mahia ya Kenya.
Katika mchezo wa mapema uliowakutanisha Gor Mahia na Khartum N ziligawana pointi baada ya sare ya 1-1.
Mechi za mwisho za Kundi A zitachezwa Jumapili, Yanga ikimaliza na Khartoum N na Gor Mahia ikicheza na Telecom. KMKM imemaliza mechi zake na pointi tatu zilizotokana na ushindi wa 1-0 dhidi ya vibonde Telecom ya Djibouti.

Yanga SC yashangaza

Dar es Salaam. Pamoja na kupata ushindi wa mabao 3-0 jana, Yanga iliweka rekodi mbaya ya kukosa penalti mbili ndani ya dakika 10 za mchezo huo dhidi ya Djibouti Telecom kwenye Uwanja wa Taifa, Dar es Salaam.

Hata hivyo, mshambuliaji Malimi Busungu aliyeibuka mchezaji bora wa mechi hiyo na kuzawadiwa king’amuzi aliiokoa timu yake baada ya kuifungia mabao mabao mawili, dakika ya 26, akiunganisha krosi ya beki Mghana Joseph Zuttah na kuongeza la pili dakika 65, akiunganisha krosi ya kinda aliyeng’ara Geofrey Mwashiuya.

Chipukizi huyo aliyeingia uwanjani kipindi cha pili akitokea benchi alifunga bao la tatu kwa juhudi binafsi baada ya kuwatoka mabeki wa Telecom na kupiga shuti lililogonga mwamba, kisha kumgonga mgongoni kipa Nzokira Jeef na kuingia wavuni na kuiweka Yanga katika nafasi nzuri ya kufuzu kwa robo fainali ya mashindano ya Kombe la Kagame.

Yanga iliingia kwenye mchezo huo ikiwa na kumbukumbu ya kufungwa mabao 2-1 na Gor Mahia ya Kenya Jumamosi kwenye mechi ya ufunguzi pamoja na kukosa penalti iliyopigwa na nahodha Nadir Haroub ‘Cannavaro’ na kadi nyekundu ya mshambuliaji wake, Donald Ngoma.

Jinamizi la kukosa penalti liliendelea kuiandama timu hiyo baada ya washambuliaji wake vinara wa ufungaji msimu uliopita, Amissi Tambwe na Simon Msuva kukosa penalti ndani ya dakika 10, huku Cannavaro akijiweka kando wakati wa upigaji wa penalti hizo.

Tambwe alikosa penalti yake dakika 39, baada ya Msuva kuangushwa ndani ya eneo la 18 na beki wa Telecom, Warsama Ibrahim aliyepewa kadi ya njano kwa kitendo hicho.

Wakati mashabiki wakishangaa, Tambwe kukosa penalti hiyo katika dakika 45, Yanga ilipata penalti ya pili iliyopigwa na Msuva iliyoshia mikononi mwa kipa wa Telecom, Jeef na kuwafanya mabingwa hao mara tano wa Kagame kwenda mapumziko wakiwa mbele kwa bao 1-0.

Kutokana na kukosa penalti hizo, kocha Hans Pluijm aliwapumzisha Msuva na Tambwe na kuwaingiza Mwashiuya na Kpah Sherman wakati Telecom ilimtoa Said Elmi na kumwingiza Warsama Said.

Kipindi cha pili Telecom iliyovaa jezi nyekundu na kushangiliwa kwa nguvu na mashabiki wanaodhaniwa kuwa wa Simba ilianza kucheza kwa kujiamini kulinganisha na dakika 45 za kwanza ambacho Yanga ilitegeneza nafasi nyingi, lakini washambuliaji wake walikosa umakini.

Yanga iliyocheza mfumo wa 4-3-3, ilitawala vizuri katikati ya uwanja baada ya kuingia kwa Mwashiuya na Sherman waliokuwa na maelewano mazuri na viungo wa Salum Telela, Deus Kaseke.

Kwa matokeo hayo, Yanga inahitaji ushindi dhidi ya KMKM ya Zanzibar ili kujihakikishia kucheza hatua ya robo fainali ya mashindano hayo.

Katika mchezo wa mapema, wawakilishi wa Zanzibar, KMKM walijiweka katika mazingira magumu ya kufuzu kwa robo fainali baada ya kukubali kipigo cha mabao 2-1 kutoka kwa Al- Kahrtoum ya Sudan kwenye uwanja huo.

Mshambuliaji Salah Bilal alifungia Al- Khartoum bao la kuongoza, dakika ya 7, likiwa ni bao lake la tatu katika mashindano hayo ya mwaka huu na kumfikia kiungo mshambuliaji wa Gor Mahia, Michael Olunga mwenye idadi hiyo.

KMKM ilisawazisha bao hilo kipindi cha pili kupitia kwa Simon Mateo dakika ya 58, akitumia mpira mrefu uliopigwa na kipa wake ulioshindwa kuolewa na mabeki wa Al Khartoum uliompa mwanya mfungaji kufunga bao hilo ambalo ni la pili kwake.

Al- Khrtoum iljihakikishia pointi tatu muhimu na nafasi kwenye robo fainali baada ya kupata bao la pili, dakika 84, lililofungwa na Anthony Agay.

Katika mchezo wa Kundi C, uliochezwa Uwanja wa Karume, KCCA ya Ugand imeziduka kwa kuichapa Adama City ya Ethiopia kwa bao 1-0.